Аб вытворчасці сельскагаспадарчай прадукцыі ў студзені – ліпені 2024 г.

У студзені – ліпені 2024 г. у гаспадарках усіх катэгорый (у сельскагаспадарчых арганізацыях, сялянскіх (фермерскіх) гаспадарках, гаспадарках насельніцтва) вытворчасць прадукцыі сельскай гаспадаркі ў бягучых цэнах склала 1650,1 млн. рублёў і павялічылася ў параўнанні са студзенем – ліпенем 2023 г. у супастаўных цэнах на 21,3%. У сельскагаспадарчых арганізацыях вытворчасць прадукцыі склала 1579,4 млн. рублёў, або ў супастаўных цэнах на 22% больш, чым у адпаведным перыядзе папярэдняга года. Высокi тэмп росту прадукцыі сельскай гаспадаркі абумоўлены апераджальнымi тэмпамi уборкi збожжавых і зернебабовых культур у бягучым годзе.

У гаспадарках усіх катэгорый вытворчасць жывёлы і птушкі (у жывой вазе) склала 127,2 тыс. тон, што на 6,4% больш, чым у студзені – ліпені 2023 г., малака – 445,3 тыс. тон (на 5,2% больш). Яек атрымана 209 млн. штук. На долю сельскагаспадарчых арганізацый прыходзiцца 98,2% аб’ёма вытворчасцi жывёлы і птушкі (у жывой вазе), 96,3% малака i 83,8% вытворчасцi яек.

На 1 жніўня 2024 г. у сельскагаспадарчых арганізацыях налічвалася 506,9 тыс. галоў буйной рагатай жывёлы, у тым ліку кароў – 167,5 тыс. галоў. Колькасць свіней склала 187,3 тыс. галоў, што на 11% больш, чым на адпаведную дату папярэдняга года.

На 1 жніўня 2024 г. у сельскагаспадарчых арганізацыях збожжавыя і зернебабовыя культуры (без кукурузы) скошаны з 51,7% плошчы, якая падлягае ўборцы (на 1 жніўня 2023 г. – 16,8%). Усяго намалочана збожжа ў першапачаткова апрыходаванай вазе 439,3 тыс. тон, што ў 3,2 разы больш, чым на адпаведную дату 2023 года, пры сярэдняй ураджайнасці 25,8 цэнтнера з аднаго гектара ўбранай плошчы.

У вобласці працягваюцца работы па нарыхтоўцы кармоў. На 1 жніўня 2024 г. у сельскагаспадарчых арганізацыях нарыхтавана кармоў 552,9 тыс. тон кармавых адзінак (на 46% больш, чым на 1 жніўня 2023 г.), з iх кармоў з траў – 436,7 тыс. тон (на 26% больш). У разліку на ўмоўную галаву для грамадскага пагалоўя жывёлы кармоў нарыхтавана 9,7 цэнтнера кармавых адзінак (на 42,6% больш), кармоў з траў – 11,5 цэнтнера (на 30,7% больш).