У рамках акцыі «Кожная пятніца – роднае сваё» супрацоўнікі статыстычных аддзелаў Бабруйшчыны і Глусчыны наведалі знакавыя мясціны сваіх рэгіёнаў

Калектыў аддзела статыстыкі г.Бабруйска і Бабруйскага раёна пабываў на Бабруйскай фабрыцы мастацкіх вырабаў, заснаванай у 1937 годзе. Гасцей уразіла разнастайнасць сувеніраў – ад аўтэнтычнай вышыўкі да мастацкай коўкі і вырабаў з саломкі. Статыстыкі набылі памятныя сувеніры, падтрымаўшы мясцовых вытворцаў.

А работнікі аддзела статыстыкі Глускага раёна здзейснілі экскурсію ў школьны музей Сярэдняй школы № 1 імя С.І.Грахоўскага. Там прадстаўлена ўражлівая калекцыя рэчаў паэта: пішучая машынка, на якой ён пісаў вершы, настольная лямпа, рукапісы, канверты і паштоўкі з яго подпісам, драўляны чамадан, а таксама бюсты Коласа і Пушкіна – любімых паэтаў Грахоўскага. У двары школы ўстаноўлены памятны знак – адкрытая кніга з барэльефам паэта і радкамі яго верша пра родную Глусчыну. Экскурсію правёў экскурсавод, сям'я якога добра ведала Сяргея Іванавіча. Удзячныя работнікі статыстыкі пакінулі водгук і найлепшыя пажаданні ў кнізе Ганаровых гасцей.

Абедзве сустрэчы яшчэ раз пацвердзілі: падтрымліваць родных вытворцаў і цаніць свой край – гэта і проста, і прыемна.

22 мая 2026